ولې باید ویټامين ډي معاینه کړو؟

ويټامینونه داسې مواد دي چې د بدن د نورمالو دندو د پرمخ بېولو لپاره اړپن دي او مختلف ډولونه لري. چې له هغې جملې ویټامین ډي هم دی او اصلي دنده یې په بدن کې د کلسیم او فاسفېټ یا فاسفوریک اسید مالګې اندازه برابرول دي، چې د بدن په وده او د هډوکو، غاښونو او عضلو په روغتیا او خوندیتوب کې ډېر اهمیت لري. سربېره پردې نورې مهمې دندې هم لري، ویټامین ډي په شحمو کې منحل ویټامین دی، چې د بدن په شحمېیاتو کې ذخیره کېږي. ویټامین ډي په دوه ډوله په کولمو کې وینې ته جذبېږي. د ويټامین ډي د کمبود له کبله په لویانو کې د هډوکو نرم کېدو (Osteomalacia) او په کوچينیانو کې د هډوکو نازکوالي او کوږوالي (Rickets) په نامه ناروغۍ رامنځ ته کوي.

په بدن کې د ویټامین ډي اهميت

ویټامین ډي د التهاب په کمېدو، عصبي سیستم د دندو تنظیم ( هغه سیستم چې د بدن نورو غړو ته پیغام وړي) د ګلوکوز په تنظیمولو کې، د زړه د ناروغیو، لوړ فشار، د شکر په مخنیوي کې مهم رول لري او د وینې د غوړو په کمولو کې همدارنګه ويټامین ډي د کولمو او پروستات د سرطان په مخنيوي کې ډېر مهم رول لري.

ویټامین ډي او کرونا

په دې وروستیو کې د ځینو ډاکټرانو او څېړونکو دې ته پام شوی دی، چې دغه ویټامین د کرونا پر وړاندې د بدن د مقاومت په لوړېدو کې ډېر اغېز لرلی دی او په هغه چا کې چې د دغه ویټامین اندازه نورماله ښودل شوې، نو هغوی د دغې وبا له امله ډېر نه دي کړېدلي او نه یې هم د مرګ کچه دومره لوړه وه.

ویټامین ډي د زکام، کرونا او نورو سختو تنفسي ناروغیو په وړاندې ښه وسله ده.

څنګه کولای شو د خپل بدن ویټامین ډي پوره کړو؟

ویټامین ډي د لمر د وړانګو په واسطه په پوستکي کې په غیر فعال شکل تولیدېږي، وروسته د ځيګر او پښتورګو په واسطه فعالېږي او د بدن نورو غړو ته ترڅو خپله دنده سرته ورسوي لېږدول کېږي. هر انسان کولای شي په اونۍ کې د دوه نه تر درې ځلې د ۵ دقیقو نه تر ۳۰ دقیقو پورې لاسونه او پښې یا هم ټول بدن د سهار له یوولسو د مازدیګر تر درېیو بجو پورې د لمر وړانګو ته په بشپړ ډول لوڅ کړي.

د ویټامين ډي ورځنۍ اړتيا

نظر عمر ته په کتو له 400 IU څخه تر 1000 IU واحدو پورې توپیر کوي.

کوم کسان د ویټامین ډي د کمښت سره مخ کېږي؟

  • نوي زېږېدلي ماشومان
  • هغه ماشومان چې عمر یې د شپږو میاشتو نه کم وي
  • په ډېر عمر لرونکو کسانو کې
  • هغه کسان چې کورونه یې لمر نه لري
  • هغه کسان چې پوستکي یې تېره وي
  • هغه کسان چې ډېر چاغ وي یا يې د جراحي عملیات په واسطه د معدې کومه برخه اخیستل شوي وي.
  • هغه ښځې چې په دایمي ډول سخت حجاب کوي او په داسې کورونو کې ژوند کوي، چې د لمر وړانګو سره نه مخامخ کيږي.
  • د ژمي په موسم کې نسبت نورو موسمونو ته د ويټامین ډي کموالي زیات ليدل کېږي.

د ویټامین ډي د کموالي له کبله لاندې ستونزې رامنځ ته کېږي:

  • د هډوکو درد
  • ضعیفي
  • زیات خوله کېدل
  • د بدن دوامداره درد
  • د هډوکو پوده کېدل
  • د زخم نه جوړېدل
  • Osteomalacia)) د هډوکو نرم کېدل
  • –  (Rickets) د هډوکو نازکوالی او کوږوالی
  • خستګي
  • الرژي (حساسیت)
  • ویره، ذهني فشار او ژور خپګان

په بدن کې د ویټامین ډي مقدار (اندازه)

ویټامین ډي که چېرې ۳۰- ۱۰۰نانو ګرام پر میلي لېتر  پورې وي کافي ده. که چېرې ویټامین ډي له دې څخه کم وي د دغه ویټامین کموالی او که د (۱۵۰ نانو ګرام پر میلي لېتر څخه په بدن کې زیاته شي مسمومیت دی.

 د ویتامین ډي زیاتوالی د لاندې ستونزو سبب کېږي:

  • د زړه بدوالی
  • –   بې اشتهایي
  • –   د بولو زیاتوالی
  • د پښتورګو تیږې

 د ويټامین ډي منابع

  • د ځیګر غوښه
  • د ماهي غوښه
  • مستې
  • د هګۍ زېړ
  • پنېر
  • شیدې
  • حبوبات لکه غنم، لوبیا، دال، نخود او داسې نور.

مونږ ته لازمه ده چې د خپل بدن په اړه پر ټولو روغتیايي معلوماتو ځان خبر کړو او په صحي لارښوونو عمل وکړو؛ګرانو هېوادوالو! تاسو کولای شئ، په دېوان بیګي کلینیک کې د ویټامین ډي معاینه همدارنګه نور پرمختللي معاینات د نړیوالو معیارنو مطابق په ارزانه بیه ترسره کړئ!

Leave a Comment

ستاسو برېښناليک به نه خپريږي.

Scroll to Top